موضوع هايف
أخيراً و الحمد لله توقفت الحرب فى لبنان, و بدأ الجيش الاسرائيلى فى الانسحاب, و لم يعد أحد مضطراً لمواجهه الموت من أجل أفكار السيد حسن نصر الله الكاتيوشيه, فليرحم الله من ماتوا شهداء هذه الكارثه.
أنا فعلاً فرحان عشان الحرب خلصت, و بالمناسبه دى انا عايز أكتب فى موضوع هايف جداً ملوش أى لازمه. أنا هاشرح طريقه عمل البيض زى اللى عملها V فى فيلم V for vendetta . تنويه هام, جميع حقوق طبع و توزيع الطبخه محفوظه لمكتشفها علاء السادس عشر. تـنويه هام برضه, الطبخه تستهلك الكثير من الزبد, فإذا كنت من أصحاب الأوزان المتوسطه فما فوق فلا تكمل قراءه التدوينه. أنا حاسس إن البلوج ده شكله هايقلب بلوج طبيخ بس ما علينا.
المقادير:
شريحه عيش توست
بيضه
زبده طبعاً
شريحه جبنه متوسطه الملوحه, فلمنك مثلاً
الإعداد:
سخٌن الطاسه جيداً
أضف قطعه الزبد
قم بتحمير وجه واحد من العيش التوست
ارفع العيش و أضف قطعه سمن أخرى
ضع التوست على الوجه الآخر (لا تُحمرها )
ضع قطعه الجبنه فوق التوست
فوقها قطعه زبد
اكسر البيضه و ضعها فوق العك ده كله
أضف قليلاً من الملح
إخفض درجه حراره الموقد قدر المستطاع
غطى الطاسه بأى غطاء كبير لتضمن تسويه البيضه بالحراره
استنى لما تستوى البيضه , أقول ايه تانى, قم بأكلهاا؟
posted by motaz elmasry @ 2:29 AM
18 comments
18 Comments:
يا معتز!!!
انت راجل بركة
أنا امبارح قبل ما أنام كنت بافكر في الأكلة دي
بس غالبا التوست "بيبوش" من البيضه
و بيبقى شبه أكل البط
يمكن عشان كده لازم أحمر العيش؟
أدامك الله
لا يا ريس, العيش مش بيبوش ولا حاجه, انتا بس اديله تحميره حلوه كده على وش واحد, و بعدين اقلبوا و حط الحاجات التانيه الكتيره دى, و غطيه و سيبه يعيش حياته, و تبقى ادعيلى :)
يا معتز ربنا يخليك اسحب الوصفة دى حالا
يا اما تأكد ان البيض يستوى على الاخر
يا عم البلد موبؤة بانفلونزا الطيور والبيض مش خالص من المشكلة ولا النوايا ايه بالضبط ؟
الوصفة بغرض الابادة ؟ سلاح جديد مفتكس
وبعدين فرحتك بالانسحاب عايزة حاجة حلوة شوف وصفة تارت من فضلك خلى الدنيا تحلو
تحياتى من المطبخ برده
تمت بنجاح
الفرق الوحيدأنني قد أضفت البيض مخفوقا و ليس كبيضة كاملة
و بالتالي أتحكم في كمية البيض
ــــــــــ
توتا
يعني الواحد مقموع و متعكنن في أغلب الحاجات، و لما بيلاقي حاجة تبسطه زي أكله هايفة ، تخوفينا و تقولي أنفلونزا؟
أنا حاكل إللي في نفسي إنشالله فيها إيه
الانبساط عملة نادرة
أحمد باشا
مبروك يا ريس انها اشتغلت, كلها بقى و انتا بتقول van guarding of the vice and the violant victious of the violation of violance :)
توتا العزيزه
سيبك انتى من انلونزا الطيور و الكلام الفاضى, احنا شعب ياكل الزلط, حتى بأمارة المبيدات الحشريه فى الأكل, و الأسمده المعالجه كيميائياً و تؤدى فى الغالب الى سرطان, و اللحوم اللى مش عليها أى كشف طبى, و محلات الأكل اللى ماعلهاش أى رقابه, والهواء الملوث و عوادم المصانع, السيارات الللى ماعلهاش أى فلاتر, و الميه اللى طوب الأرض بيرمى فيها بلاوى و بتنزلنا من الحنفيات و ليها لون و طعم و ريحه و ملمس كمان, ياعنى لا أكل من السوبر ماركت نافع ولا من المطاعم, و لا الهوا اللى بنشمه و الميه اللى بنشربها, و بناء عليه فقد أصدرت فتوتى رقم 547894 أنا معتز المصرى بأن أكل البيض فى السليم و مافيش فيه أى حاجه مضره
كده يامعتز بتكشف اسرارى المطبخية وأنا اللى كنت عايز أعزمك على أكلة توفو بالبشمل ,عموماً عشان خاطر أحمد مسمحك,وبالنسبة للجبنة دى تحطها أخر حاجة بعد ما البيض يستوى علشان متسيحش وتبقى بلوظة.
العزيزة توتا
تقدرى تختارى بين وصفة تورتة التفاح الألمانية أو تورتة البصل الفرنسية ؟
العزيز احمد
سلامتك يا سيدى من العكننة بس كنت بحاول استفز معتز يمكن يطلع حاجة احلى من البيض والجبنة يعنى لازم تبوظ المخطط بتاعى
كنت سيبه يطلع كل المواهب وكنت هتنبسط اكتر
معتز
على رأيك هى جت على البيض
انا معنديش مانع تاكله نى تاكله بقشره
ولا اقولك بلاش القشر يا ميزو لتعملها هو كله كالسيوم بس مفيش داعى للتهور
علاء
يا هلا يا هلا ادخل على تارت التفاح واقفل على البصل مش ناقصة بصل خالص الايام دى
منتظرة الوصفة
تحياتى
طب و الله قشطه يا جماعه, أنا قلت فى الأول ان التدوينه دى هايفه زياده عن اللزوم, بس تمام و الله اديينا ضحكنا شويه
علاء
معلش بقى يا عم احنا كلنا تلامذتك و المسامح كريم :)
توتا
مش عايز أحبطك, بس أنا معلوماتى فى الطبيخ نيله خالص, و أهو عايش بقالى سنه لوحدى قضتها بستر ربنا و معملتش مصيبه و أنا بطبخ
على فكره تورته البصل اللى علاء قال عليها رهيبه, هو الحقيقه ان علاء شخصيه رهيبه فى المطبخ, انت اتفقى مع أحمد و برشتوا على علاء فى غدوه أول لما ينزل مصر :), اوعا يفلت منكوا
هاهاهاهاهاهاهاها
عجبانى جدا الوصفة بس نفسى تكون بتخن لانى حلمى انى اتخن ومفيش حاجة نافعة
يلا والله جوعتونا يا خونا
فطائر التفاح
سيح 300 جرام زبدة مع ملعقة سكر كبيرة وشعرة ملح وضيف دقيق حوالى 500 جرام ممكن أكتر أوأقل وأعمل عجينة متماسكة لا تستعمل ماء وحط العجينة ساعة فى التلاجةوفى نفس الوقت قطع 700 جرام تفاح يفضل التفاح البلدى وحط عليه 5 معالق سكر مع 150 جرام زبيب مع 100 جرام زبدة وحطهم على النار لحد ما التفاح يبقى أصفر حوالى5 إلى 8 دقايق ,هات العجينة من التلاجة وأفردها فى صينية صغيرةالعجينة حتعمل ما يشبه البيتزا المتوسطة الحجم ما تخافش إذا كانت العجينة مش متامسكة ده عادى المهم حطها فى الصنية وأعمل لها حروف من الأجناب وحط على الوش التفاح المستوى وحط الصينية فى الفرن حوالى 30 -40 دقيقة بدرجة حرارة 180وبعد كده سيبها تبرد ,كل وأدعيلى
علاء
ايه يا عم الوصفة الهايلة دى
بكره هجرب ويا هدعيلك يا هدعيلك
ومعتز محملناامانة لو جيت مصر انا واحمد مش هنسيبك وهننزل عليك بالبراشوت من السما وشكلك هتعمل كتاب وحقوق الطبع محفوظة
تحياتى وشكرا على الوصفة وهطمنك بقى
يا نهار اسود, ده البلوج قلب بلوج طبيخ بجد, هاهاهاها :)
على فكره انا اكلت مره فطيرة تفاح فى مكدولندز اللى فى مصر, و كانت استغفر الله العظيم ملهاش أى لزمه, و أنا بقترح إن علاء يبيعلهم الفطيره بتاعته, أكيد هتكون أحسن من بتاعتهم ميت مره :)
العزيزة توتا
معقولة برضه أعزمكم فى مصر حد يعزم أهل البيت ده أنتم اللى تعزمونى وتفسحونى وتشترولى كتب كمان أنتى وأحمد وأنا اللى حبرشت عليكم .
ماليش دعوة يا عم
أنا حاكل في مكدونالدز
:)
ـــــــــــــــ
أنا في الخدمة ، إنتوا ما جربتوش الأكل بتاعي ... ولاّ اكمني ساكت و سايبكوا؟!
لما ترجعوا انتوا الجوز، حادعوكم لمناظرة جماهيرية حاشدة
و الميدان واسع
!
بالمناسبة
التدوينة دي جمعت تعليقات أكبر من تدوينات سياسية مهمة في نفس المدونة!!!
تفتكروا ده معناه إيه؟
إن الطبيخ أهم من السياسة بكتيييييير
أي و الله
اعتقد انه استوي علي الاخر
عزيزي معتز
سيكولوجية فنون الطبخ
يقول علماء الهند أن لجسد الإنسان سبعة مراكز تتجمع فيها الطاقة البشرية, ويسمون كل واحدة منها تشاكرا
Chakra,
وكلمة تشاكرا من لغة السانسكريت المقدسة الهندية القديمة , وتعني عجلة أو دوامة , وتعني في هذه النظرية مصدر تجمع الوعي ونظام الطاقة في الجسد,مراكز الطاقة هذه تعمل كصمامات تنظم تدفق الطاقة في نظام الطاقة الجسدي.
وهي تماثل نفس نظرية تشي الصينية وهي الطاقة المحركة للإنسان بأنواعها العديدة والمختلفة.
إيه بقا علاقة ده بالطبخ
اللون والطعم والرائحة والتصميم أو الابداع الشكلي... وهذا يقابل 4 حواس من الخمسة الاساسية الي جانب الرضا النفسي الناتج عن الانتاج ...يا راجل ! شوف إزاي ..
يعني الاكل والطبخ مهم للتشاكرا البرتقالية وتسمى أحيانا تشاكرا الطحال , وتسمى مركز الشعور ولونها البرتقالي , وهي مرتبطة بالوعي والأكل وباحتياجات الجسد... وكمان تشاكرا العين الثالثة
وتسمى تشاكرا الحاجب أحيانا, وتسمى مركز الوعي كذلك , وتقع بين الحاجبين , ولونها النيلي أو الأزرق الداكن, ومتصلة بالجبهة من أعضاء الجسد وcarotid plexus
, ولها علاقة بالوعي
والإدراك والإلهام وهي التشاكرا ذات الاتصال بالكيان العميق للإنسان أو الروح أو المعاني الروحانية وكذا التفكير اللا واعي أو الباطن , وهو مكان المصدر الحقيقي للدافعية التي توجه أفعالنا , وفي الحقيقة , حياتنا.
طب المقدمة الطويلة دي ليه ؟
عشان ببساطة الطبخ والاكل متعة إنسانية عالية واهميتها تفوق ادراكنااليومي لأشياء.
إذن الموضوع مش هايف ..
وبما إني من عشاق الاكل الراقي وليس الاكل الكتير او بالتعبير الامريكاني
Fine dining
قولت أدخل اسلم واطمن ان الوصفة سليمة ..
وبما اني ايضا خبرة في المطبخ الايطالي والياباني لعشقي لكليهما، فمستعد لتقديم المشورة والنصح.
ملحوظة أخيرة لأحمد في وصفة
V for V
من المفضل استخدام توست سميك من العيش المصنوع من القمح وليس الابيض
تقريبا في سمك الفرينش توست ويفضل الهول جراين
Whole Wheat toast or Whole grain one
ولنتيجة افضل استخدم
Pam butter spray
بدل من الزبدة
أديني بتكلم في الطبخ أهه، عشان محدش يقول اني باكتب تعليقات علي المواضيع المجعلصة بس.
وطبعا العزومة علي أحمد لما ننزل مصر ... ولا إيه
كل سنة وانتم طيبين
أحمد
الطبخ فعلاً أهم من السياسه, يوجد أمثال شهيره عن الأكل, بعضها لا يزال عالق فى ذهنى لطرافتها مثل "نويت الطحن من هذا الصحن" , و "لا سلام ولا كلام على طعام", أما نشوف التدوينه اللى جايه شكلها هابقى عامل :)ازاى
عزيزى الطبيب
ياااه, حتى فى المواضيع الهايفه بتقول كلام جامد, أنا متشكر جداً على المعلومات
حقيقه فعلاً إن الطبخ هو فن و متعه إنسانيه إذا كانت تحتنطاق السيطره و لم تخرج عنه لتصبح نهم
تحياتى
انشاء الله هقعد أجازه نهايه الاسبوع دى و أدييها تدوينه مفيده شويه
Post a Comment
<< Home